هيثم عرابي يعلن عن خطوته الجديدة ( فريق بالقسم الرابع )
كشف هيثم عرابي مدير التعاقدات السابق بالنادي الاهلي، عن نيته في تكوين فريق يحمل اسم ( عرابي) يشارك به الموسم المقبل بدوري الدرجة الرابعة.
وكتب عرابي على صفحته الشخصية بموقع التواصل االاجتماعي فيس بوك : توكلت علي الله ..حلم جديد وتحدي جديد.
واردف : فريق في دوري الدرجة الرابعة السنة الجاية بإذن الله .. هناخد السلم من أوله.
وهعمل إختبارات في مصر كلها بداية من الجمعة القادمة (المنصورة ) . و ايضا تجهيز فرق الناشئين ومشاركتهم في الدوريات المختلفة الموسم القادم.
عندي إيمان كبير إن محافظات مصر وخاصة الصعيد ومنطقة الدلتا فيها مناجم لاعبين محتاجين فرصة والظروف بتبعدهم عن شغفهم .وبما إن طول عمري بحب المغامرات والتحدي فقررت ابدأ رحلة التحدي الجديدة من تحت خالص .. وهنلف محافظات مصر كلها أنا ومجموعة من الكشافين المتخصصين في إكتشاف اللاعبين وفريق عمل متكامل عشان أدور على المواهب اللي تستحق تعيش معايا الحلم من بدايته .. كل اللي هعمله هنوفرلهم بيئة طبيعية وإحترافية بإستقدام مدير فني فاهم كرة وإدارة إحترافية تفرض نظام علي اللاعبين وتعطيهم الأجواء الإحترافية بشكل كامل, وأنا واثق إن شاء الله هنقدر نطلع لاعبين يشرفونا وفي خلال وقت قصير نوصل للحلم الأكبر. وكان لازم ابدأ الحلم دا من مسقط رأسي المنصورة وعشان كده هنبدأ بمحافظة الدقهلية يوم الجمعة القادمة 4-5 من الساعة 8 صباحاً.
وبالتحديد " ملعب عمال المنصورة "
وده عنوانه بالظبط . شارع عبدالسلام عارف بجوار الأمن المركزي .
ودي المدن اللي هنزورها بعد ما نخلص إختبارات في المنصورة : القاهرة - الجيزة - الإسكندرية - الزقازيق - المحلة - دمنهور - دمياط - السويس - بني سويف - المنيا - أسيوط - سوهاج - الأقصر . - أسوان .
وفي حالة نجاحك في الإختبارات الأولية بالمحافظات هتدخل في إختبارات تانية علي مرحلتين بالقاهرة اللي هيتم من خلالهم إختيار الفريق النهائي اللي هيخوض الدوري الموسم القادم .
