وجهة نظر .. يا واد يا مؤمن !
هل تتذكرون التعليق الشهير الذى أطلقه الداعية الإسلامى خالد عبدالله تجاه أحد أعضاء حركة تمرد ساخراً من ادعاء تدينه وجملته المعروفة يا واد يا مؤمن والتى باتت وقتها أشهر تعليق على الكثير من المفارقات فى حياتنا اليومية وخاصة من يدعى التدين أو الوفاء والإخلاص أو المثالية بأى شكل من أشكالها .
واليوم ومع حالة الجدل الواسعة التى يشهدها الوسط الكروى بسبب صفقة مؤمن زكريا من الزمالك للأهلى وحقيقة إيقافه وغيرها من الأمور الخاصة بالصفقة بات لزاماً علينا أن نقول تلك الجملة الشهيرة للعديد من رجال الوسط الرياضى ...
خلونا نتكلم بالبلدى ونشوف كام واحد مؤمن معانا ....
- لما يطلع مسئولى الأهلى ويحاولوا يقنعونا أن فجأة صفقة مؤمن زكريا حصلت فى الساعات الأخيرة وأن اللاعب مكنش فى حساباتهم قبل كده وكمان رغبة اللاعب هى اللى حركتهم فى الساعات الأخيرة ... يا واد يا مؤمن .
- لما تلاقى مؤمن زكريا بيبوس الفانلة وبيرقص مع لاعبى الزمالك وهيعيط من كتر الانتماء ومع أول ساعة يتفتح فيها القيد يروح يوقع للأهلى .. يا واد يا مؤمن معرفتكش انا كده .
- لما يطلع حسن شحاته ويقولك أرحب بتدريب المنتخب فيلاقى الاتحاد يقول لا هيكون مدرب أجنبى .. يطلع بعدها يقولك برحب ومقدرش اقول لا للزمالك يلاقى رئيس الزمالك يقول شحاته مش فى حساباتنا ... يطلع بعدها ويقولك انا مركز مع المقاولون العرب بس ... يا واد يا مؤمن .
- يطلعلك محمود عبدالعزيز لاعب الإسماعيلى ويتفاوض مع الأهلى رغم أن الدراويش اللى صنع نجوميته بعد ما كان فى القناة ويلوى دراع ناديه ويطلب الرحيل ويعرض نفسه على الأهلى ولما يترفض والصفقة تقف يقولك ده الإسماعيلى كان حلم حياتى وانا تحت أمر النادى ... يا واد يا مؤمن .
- لما يطلع عبدالواحد السيد بعد أن منى مرماه بسداسية من الجيش وهدفين من سموحة وهدف فى الداخلية وتراجع مستواه الفنى الملحوظ ويتأكد غيابه عن مباراة المصرى لأن مصطفى كمال أفضل منه ويقول مش هلعب ادام الزمالك ده فريقى وانا مقدرش والعشرة والسنين الحلوة ... يا واد يا مؤمن .
- لما الأهلاوية يتهموا الزمالكاوية بعقدة الاضطهاد مع كل مرة يتكلموا فيها عن محاباة الحكام ويطلع عبدالمنعم عمارة يقول نفس الكلام أن الأهلى بيكسب بالحكام وبرضه يهاجموه فالموضوع ده عادى .. انما لما تلاقى واحد بيهاجم تسوبيل مدرب الأهلى السابق بعد شكواه من الحكام دلوقت وأن الأهلى بيكسب بالحكام من أيام ما كان مدرب ليه لازم تقوله .. يا واد يا مؤمن ده ألمانى يا جدع .
- بعد النجاح العظيم اللى حصل فى عهد مجلس اتحاد الكرة الحالى وتلاقى عندهم عين يترشحوا لمجلس الشعب والبرلمان .. طب بأمارة إيه يا واد يا مؤمن منك ليه !
- لما يحتفل جمهور الزمالك بمرور 104 سنة على النادى النهاردة وتطلع تصريحات كتير زى الزمالك هو الحياة أو حب واحد ونادى واحد أو أى جملة حلوة من جمهور وفى ومخلص لناديه ماشى .. بس لما تلاقى واحد كاتب هو الوحيد اللى بيفرحنى .. يا راجل يا كداب .
- لما تلاقى إبراهيم صلاح شارب جرعة انتماء وطالع يتكلم عن الزمالك اللى بيصنع النجوم والفانلة البيضاء وهو نفسه مشى من الزمالك عشان الفلوس ولعب فى السعودية وكمان كان بيفكر فى وقت فى عرض الأهلى قبل ما الزمالك يرجعه ... يا واد يا مؤمن .
- لما تلاقى جمهور الأهلى ماسك أوى على موضوع شهداء بورسعيد 72 ويقوم رادد عليه جمهور بورسعيد ويقولك انا كمان عندى 53 شهيد حصيلة اللى ماتوا بعد الواقعة وبيدافعوا عن حقوقهم .. فى الوقت اللى فيه هداف المصرى دلوقت أهلاوى وهو أحمد رؤوف وصفقة الموسم مؤمن زكريا كان جايب جونين ولاعب فى المصرى يبقى لازم نفصل ونقول دول فى وادى ودول فى وادى تانى .. يا عم المتعصب خليك راجل مؤمن .
- لما يتكلم رئيس الزمالك فى أى حاجة .. افتح القوس وقول (إزاى يا جدع .. معرفتكش انا كده .. يا راجل كبر مخك .. يا واد يا مؤمن !!!
تهدينى بصيرتى .. وإن زاغ البصر
ويبقى الود موصولاً ما بقيت وجهة النظر
للتواصل مع الكاتب عبر الفيس بوك من هنا
