"كلام في الكورة" مع إنجي يحيي مذيعة "نهارك أبيض"

قبل اربع أعوام من تاريخه في نهاية عام ٢٠١٦ ظهرت للمرة الأولى عبر شاشة اون تايم من خلال تقديم نشرة اخبار رياضية تناوب على تقديمها بعض المذيعين والمذيعات الشباب..

ومع مطلع العام الماضي أطلت علينا من خلال نافذة جديدة ومنبر رياضي اخر هو قناة نادي الزمالك..

ظهور ملفت واطلالة جذابة اشاد بها الكثيرين من متابعي البرامج الرياضة بصفة عامة ومحبي نوعية الفقرات الصباحية بصفة خاصة..

هي المذيعة الشابة التي تالقت في عام ٢٠٢١ من خلال تقديم برنامج نهارك ابيض انجي يحيى..

حاورها “الفجر الرياضي” في العديد من النقاط التي تخص حياتها المهنية والشخصية كذلك توقعتها لمسيرة الفريق الموسم الحالي ومستقبلها غدآ في الميديا الرياضية..

تعالي نبدأ كلامنا اول حاجة مين صاحب فكرة انك تدخلي مجال الرياضة وهل كانت رغبتك من الأول؟

والدي بالتحديد اول من شجعني على فكرة دخولي العمل الرياضي خلال فترة افتتاح قناة اون سبورت..

قمت بعمل تيست ونجحت فيه مع ميريهان عمرو وأمل صالح وبلال رزق وكريم خطاب وشاركت في تقديم برنامج ملاعب اون سبورت وفقرة السوشيال ميديا..

من امتى وانتي عندك الرغبة في تقديم البرامج بشكل عام؟

من وانا صغيرة أرى في نفسي اني مذيعة أو ممثلة، كنت مقتنعة اني املك شخصية المذيعة وشجعني اهلي على ذلك وبالتحديد والدي وبناء عليه دخلت كلية إعلام قسم انجليزي..

مين اكتر اعلامي أو اعلامية كان له دور في انك تحبي العمل الاعلامي؟

كنت بحب برنامج أوبرا وينفري شايفة إنه ا شخصية مختلفة عن الباقي وقدرت إنه ا تنجح بالشكل المبهر ده في بلد عنصري إلى حد ما..

اما بالنسبة للمصريين هناك لميس الحديدي ووفاء الكيلاني شايفة إنه ا مميزة جدا ونفس الأمر مني الشاذلي..

تعالي نروح لخطوة قناة الزمالك قوليلنا جت ازاي؟

كنت شغالة في اون سبورت وتركت العمل لفترة بسبب الزواج وعندنا قررت العودة تم طرح اسم قناة الزمالك وسعدت بالتكليف لاني زملكاوية أنا واسرتي بالكامل، واتمنى بالتأكيد ان اكون عند حسن ظن الجمهور الزملكاوي في نقل وجهة نظره بالشكل المطلوب..

ظهور الثلاثي محمد طارق اضا ونيرفانا العبد وانجي يحيى مع بعض عمل شكل لطيف للبرنامج وغير من فكرة البرامج الرياضية اللي محتواها بيكون في الكورة وبس.. قوليلنا تعاملك مع اضا ونيرفانا وبعد كدة احمد علي عاملة ازاي قبل وبعد الهوا؟

الحقيقة ان برنامجنا من اكتر البرامج المختلفة في القناة.. احنا بنحاول بشكل مستمر اننا نتكلم في الكورة والمحتوى الرياضي بشكل مختلف أو ترفيهي، بنحاول ناخد كومكيس ونلعب مع جمهورنا في فقرة الشارع الأبيض، سعيدة جدا بالبداية مع نيرفانا واضا شكلنا فريق عمل وثلاثي رائع، شايفة إنه ا خطوة مهمة لينا احنا التلاتة جدا، علمنا مع الجمهور من خلال السوشيال ميديا بشكل جيد، اضا من المذيعين الجيدين جدا وعلى المستوى الشخصي اخ وصديق، اما عن نيرفانا انا بستنى حلقاتي معاها بفارغ الصبر، مافيش مجال للغيرة أو النفسنه بينا نهائي، أحمد علي من الناس المجتهدين ونجح في الدخول سريعا في أجواء البرنامج..

اية اكتر موقف محرج اتعرضتي ليه في حلقة معينة؟

مافيش مواقف محرجة لكن في مواقف طريفة على الهوا مع فريق العمل، الابتسامة على الشاشة هي شعار مذيعين البرنامج وفريق العمل..

اما عن اطرف المواقف في إحدى المرات كنت بعلق على إحدى مباريات المنتخب في البرنامج وانفعلت بقوة خلال الانترو لدرجة ان " الحلق" وقع مني!!

انا عن أقرب الحلقات لقلبي كانت حلقة زوجة الراحل علاء على نجم الزمالك السابق مدام مروة وكنت متخوفة من الظهور في هذا النوع من الحلقات نظرا لصعوبة الموقف ولكنها مرت بشكل جيد وحققت ردود أفعال رائعة على السوشيال ميديا..

تعالي نروح للفريق شوية كنتي متوقعة ان الزمالك يكسب الدوري الموسم اللي فات وياتري كنتوا بتتعاملوا ازاي مع مسيرة الفريق خلال تدعيم البرنامج بشكل مستمر؟

الحقيقة ان الزمالك بشكل مستمر بيحب يفاجئنا مع أي توقع حدوث اخفاق يحدث العكس تماما في الزمالك.. الموسم الماضي محدش توقع النجاح بهذة الصورة ابدا بعد الظروف الصعبة جدا التي واجهت النادي بشكل عام ولكننا حققنا المكسب في النهاية.. سعيدة ان ظهورنا كان وشه حلو على الزمالك وعلى كل فرق النادي حققنا كل الالقاب في الألعاب الجماعية والفردية..

اطرف تعليق حد قالك عليه على البرنامج؟

ناس كتير علي السوشيال ميديا بيدعموني بشكل جيد زي القاب فراشة الزمالك واميرة القلعة البيضاء كلها أمور تسعدني جدا وهناك بعض الجمهور الاهلاوي يدعمني في عملي بشكل حيادي..

سعيدة ان الجمهور شافني صح لان المذيع الناجح ليس شكل ومظهر فقط هناك أيضا محتوى ثقافي وحضور قوى من أجل أن تكتمل كل عناصر النجاح..

انجى بتشجع مين في أوروبا؟

في إنجلترا ليفربول وفي فرنسا باريس سان جيرمان وفي أسبانيا ريال مدريد..

نجملك العالمي المفضل؟

محمد صلاح ورونالدو

مين هياخد الدوري في كل دولة من الخمسة الكبار؟

في انجلترا اتوقع ليفربول أو المان سيتي في فرنسا بالتأكيد باريس ونفس الكلام في ألمانيا البايرن وفي إيطاليا الأمور هاتكون صعبة شوية بين ميلان وانتر ميلان وفي أسبانيا اتوقع الريال يحسمها في النهاية..

أسرتك رياضية أو اهتمامتها كروية؟

اسرتي زملكاوية جدا، زوجي زملكاوي هو واصدقاوه، بيشجعني جدا على متابعة كل تفاصيل كرة القدم، نفس الكلام ولادي عمر وكلارا زملكاوية..

لو ابنك عمر قالك انا هاطلع اهلاوي هاتتعاملي بدبلوماسية ولا هاتطبقي مقولة الفنان صلاح ذو الفقار لما قال مايباتش في بيتي حد اهلاوي؟

مستحيل يطلع اهلاوي.. هايطلع اهلاوي لمين باباه ومامته زملكاوية..

اية الرياضة اللي بتفضل انجي تشوف عمر وكلارا بيلعبوها في المستقبل ؟

نفسي اشوف ابني عمر لاعب كرة.. بفكر جديا في الموضوع ده وكلارا ممكن تلعب جمباز أو تنس

نفسك تعملي ريبورتاج مع مين؟

كتير من النجوم ابرزهم طبعا محمد صلاح هو حلم اني اعمل معاه حوار ونفس الكلام شيكابالا وحازم إمام..

هل ممكن في يوم تقدمي برنامج توك شو إجتماعي ولا الخطوة لسة بدري عليها؟

مافيش حاجة دلوقتي غير اني مكملة بشكل ثابت في الزمالك وفي نهارك ابيض وكله باوانه..

سريعا قوليلنا اية حكاية موضوع التمثيل شوفنا ظهور على فترات في الآنسة فرح وقواعد الطلاق ال ٤٥؟
بالنسبة للتمثيل فشاركت في مسلسلين قبل كده الانسه فرح وقواعد الطلاق ال ٤٥
تجربة لطيفه والمخرجين اشادو بأدائي وقالولي اني بمثل حلو ومشروع نجمه لو ركزت في التمثيل لكن انا مركزه اكتر في تقديم البرامج التلفزيونية ودوري كاعلامية وممكن امثل تاني لو حسيت ان في دور مناسب ممكن يضيف لمشواري..

اخر حاجة من قلبك لجمهور الزمالك؟

جمهور الزمالك اعظم واوفى جمهور في العالم ويستحق دايما إنه يكون فرحان وفخور بفريقه.
شرف ليا اني اكون بمثل كيان الزمالك العظيم واني اكون بتكلم بأسم جمهوره الوفي ويارب دايما اكون قادره اني اتكلم بلسان وصوت الجماهير اللي حبوني ودعموني شكرا ليكم يا رب دايما اكون عند حسن طنكم ونفضل دايما واجهه مشرفه داعمه للزمالك..