عاجل.. ميدو يوجه التحية لسيد عبد الحفيظ بعد رفضه التواجد في الممر الشرفي
وجه الإعلامي أحمد حسام ميدو، سيد عبد الحفيظ مدير الكرة بالنادي الأهلي، وذلك بعد تصريحاته على خلفية رفضه التواجد في الممر الشرفي الخاص بنهائي كأس مصر والذي انتهى بفوز الزمالك بهدفين مقابل هدف.
ميدو يوجه التحية لسيد عبدالحفيظ
وأوضح ميدو في تصريحات تليفزيونية عبر برنامج الريمونتادا على قناة المحور: "أوجه التحية لسيد عبد الحفيظ على تصريحاته بشأن عدم تقبله للإهانة، وبقوله إنت كدة راجل دكر، أي حد لازم لازم يرفض الإهانة".
وتابع: "لكن كان نفسي إن سيد عبد الحفيظ، يحترم البروتوكول اللي أقره اتحاد الكرة المصري، واللي بيتمثل في الممر الشرفي وعلى فكرة البروتوكول ده مبعوت من اتحاد الكورة، مش مبعوت من نادي الزمالك، اتحاد الكرة بعت من قبل الماتش للأهلي والزمالك البروتوكول ده عشان نصدر صورة جميلة للكرة المصرية تُمثل الروح الرياضية للوطن العربي".
وأضاف: "فكرة إن الممر على المزاج زي ما قال سيد عبد الحفيظ مش داخلة دماغي وانت المفروض تكون فرحان بالفكرة حتى لو متعملتش قبل كدة".
واستكمل: "الممر الشرفي يا كابتن سيد، نادي الزمالك بتاريخه هو اللي عاملهولك، احتراما للنادي الأهلي ولتاريخه، واحتراما للعلاقات القوية بين الناديين، لكن رفضك الدخول في ممر شرفي ده مينفعش يتعمل من مدير كورة يا كابتن سيد وهذا عتابي عليك".
واختتم: "لو كان الأهلي كسب كان الزمالك هيدخل بكامل أعضائه في الممر الشرفي، أنا مع سيد عبد الحفيظ قلبا وقالبا في عدم تقبل الإهانة، ولكن عتابي عليه أنه لا علاقة للممر الشرفي بأزمتك ومشكلتك مع مرتضى منصور"
